Isaiah 46

Bíbélì Mímọ́ Yorùbá Òde Òn

³ “Tẹ́tí sí mi, ìwọ ilé Jakọbu,
    Gbogbo ẹ̀yin tí ó ṣẹ́kù nínú ilé Israẹli,
Ìwọ tí mo ti gbéró láti ìgbà tí o ti wà nínú oyún,
    tí mo sì ti ń pọ̀n láti ìgbà tí a ti bí ọ.
⁴ Pẹ̀lúpẹ̀lú sí àwọn arúgbó àti ewú orí yín
    Èmi ni ẹni náà, Èmi ni ẹni tí yóò gbé ọ ró.
Èmi ti mọ ọ́, èmi yóò sì gbé ọ;
    Èmi yóò dì ọ́ mú èmi ó sì gbà ọ́ sílẹ̀.

⁵ “Ta ni ìwọ yóò fi mí wé tàbí ta ni èmi yóò bá dọ́gba?
    Ta ni ìwọ yóò fi ṣe àkàwé mi
    tí àwa yóò jọ fi ara wé ara?
⁶ Ọ̀pọ̀ da wúrà sílẹ̀ nínú àpò wọn
    wọ́n sì wọn fàdákà lórí òṣùwọ̀n;
wọ́n bẹ alágbẹ̀dẹ lọ́wẹ̀ láti fi wọ́n ṣe òrìṣà,
    wọn sì tẹríba láti sìn ín.
⁷ Wọ́n gbé e lé èjìká wọn, wọ́n rù wọ́n,
    wọ́n sì gbé e sí ààyè rẹ̀ níbẹ̀ ni ó sì dúró sí.
Láti ibẹ̀ náà kò le è paradà
    Bí ènìyàn tilẹ̀ pariwo lé e lórí, òun kò le è dáhùn;
    òun kò lè gbà á nínú ìyọnu rẹ̀.

⁸ “Rántí èyí, fi í sí ọkàn rẹ,
    fi sí ọkàn rẹ, ẹ̀yin ọlọ̀tẹ̀.
⁹ Rántí àwọn nǹkan àtẹ̀yìnwá, àwọn ti àtijọ́-tijọ́;
    Èmi ni Ọlọ́run, kò sì sí ẹlòmíràn;
    Èmi ni Ọlọ́run, kò sí ẹlòmíràn bí ì mi.
¹⁰ Mo fi òpin hàn láti ìbẹ̀rẹ̀ wá,
    láti àtètèkọ́ṣe, ohun tí ó sì ń bọ̀ wá.
Mo wí pé: Ète mi yóò dúró,
    àti pé èmi yóò ṣe ohun tí ó wù mí.
¹¹ Láti ìlà-oòrùn wá ni mo ti pe ẹyẹ ajẹran wá;
    láti ọ̀nà jíjìn réré, ọkùnrin kan tí yóò mú ète mi ṣẹ.
Ohun tí mo ti sọ, òun ni èmi yóò mú ṣẹ;
    èyí tí mo ti gbèrò, òun ni èmi yóò ṣe.
¹² Gbọ́ tèmi, ẹ̀yin alágídí ọkàn,
    ìwọ tí ó jìnnà sí òdodo.
¹³ Èmi ń mú òdodo mi bọ̀ nítòsí,
    kò tilẹ̀ jìnnà rárá;
àti ìgbàlà mi ni a kì yóò dádúró.
    Èmi yóò fún Sioni ní ìgbàlà
    ògo mi fún Israẹli.