Isaiah 50

Bíbélì Mímọ́ Yorùbá Òde Òn

⁴ Olúwa Olódùmarè ti fún mi ni ahọ́n tí a fi iṣẹ́ rán,
    láti mọ àwọn ọ̀rọ̀ tí ó lè gbé àwọn aláàárẹ̀ ró.
O jí mi láràárọ̀,
    o jí etí mi láti gbọ́ gẹ́gẹ́ bí ẹni tí à ń kọ́.
⁵ Olúwa Olódùmarè ti ṣí mi ní etí,
    bẹ́ẹ̀ ni èmi kò ṣọ̀tẹ̀ rí;
    Èmi kò sì padà sẹ́yìn.
⁶ Mo ṣí ẹ̀yìn mi sílẹ̀ fún àwọn tí ó ń nà mí,
    àti ẹ̀rẹ̀kẹ́ mi fún àwọn tí ń fa irùngbọ̀n mi;
Èmi kò fi ojú mi pamọ́
    kúrò lọ́wọ́ ẹlẹ́yà àti ìyọṣùtì sí.
⁷ Nítorí Olúwa Olódùmarè ràn mí lọ́wọ́;
    A kì yóò dójútì mí.
Nítorí náà ni mo ṣe gbé ojú mi ró bí òkúta akọ
    èmi sì mọ pé, ojú kò ní tì mí.
⁸ Ẹni tí ó dá mi láre wà nítòsí.
    Ta ni ẹni náà tí yóò fẹ̀sùn kàn mí?
Jẹ́ kí a kojú ara wa!
    Ta ni olùfisùn mi?
    Jẹ́ kí ó kò mí lójú!
⁹ Olúwa Olódùmarè ni ó ń ràn mí lọ́wọ́.
    Ta ni ẹni náà tí yóò dá mi lẹ́bi?
Gbogbo wọn yóò gbó bí aṣọ;
    kòkòrò ni yóò sì jẹ wọn run.

¹⁰ Ta ni nínú yín tí ó bẹ̀rù Olúwa
    tí ó sì ń gbọ́rọ̀ sí ìránṣẹ́ rẹ̀ lẹ́nu?
Jẹ́ kí ẹni tí ń rìn ní òkùnkùn
    tí kò ní ìmọ́lẹ̀,
kí ó gbẹ́kẹ̀lé orúkọ Olúwa
    kí o sì gbẹ́kẹ̀lé Ọlọ́run rẹ̀.
¹¹ Ṣùgbọ́n ní àkókò yìí, gbogbo ẹ̀yin ti ń tanná
    tí ẹ sì ń fi pèsè iná ìléwọ́ fún ara yín,
ẹ lọ, kí ẹ sì máa rìn nínú ìmọ́lẹ̀ iná yín,
    àti nínú ẹta iná tí ẹ ti dá.
Èyí ni yóò jẹ́ tiyín láti ọwọ́ mi wá:
    Ẹ̀yin ó dùbúlẹ̀ nínú ìrora.