Psalme 3

Reimer 2001

Dee 3 Psalm

Doft sien Psalm aus hee fonn sien Saen Absalom flijchte must.

¹ O Herr Gott, woo sikj miene Fiend femeat ha! Doa sent fäl dee jäajen mie oppjestone sent.

² Fäl saje fonn miene Seel: "Doa es kjeene Radunk fa am enn Gott." Selah.

³ Oba du, O Herr Gott, best en Schilt romm mie; miene Harlijchkjeit, un dee, dee mien Kopp opphäft.

⁴ Ekj schreajch no mien Herr Gott met miene Stem, un Hee head mie fonn ut sien heilja Boajch. Selah.

⁵ Ekj läd mie dol en schleep; ekj wuak opp, dan dee Herr Gott bewoad mie.

⁶ Ekj woa mie nijch enjste fa dusende fonn Mensche dee sikj jäajen mie jestalt ha runnt omm.

⁷ Sto opp, O Herr Gott! Rad mie, O mien Gott! Dan du hast aul miene Fiend aune Backknoake jeschmattat; du hast dee Gottloose äare Täne jebroake.

⁸ Dee Radunk jeheat daem Herr Gott; dien Säajen es opp dien Folkj. Selah.